愛是什麼

同左女朋友一齊之後,都少左打blog,因為每晚都傾電話

而家一個星期見得兩次,見完一次,過五日先再見,之後再過兩日,其實好痛苦

感情方面,我覺得大家係不斷咁進步,只係了解既進度係慢左少少

但畢竟大家都只係一齊左個半月,所以還需要努力

今日教堂講"愛" 拍左拖會覺得,愛真係一樣好難明既事,咩野係愛,點先係愛

但今日神父講完,我發覺原來有D野,我已經做左

好似話,我地愛人,要好似天主愛我地咁樣,因為天主唔會因為你以往做錯事而唔再愛你

另外,你愛一個人,係愛佢個人,唔係愛佢係你心見中所想果個人

我之所以諗得通,都係多得上年個camp,真係令我有好大得著.

當然,我唔可以講話係學滿師,愛呢樣野,講好易,但要不斷咁去愛,係好難

值得高興既係,我至少開頭已經做到

諗返轉頭,都要多謝之前果段感情. 呢三年既空白期,令我不斷咁反省

有好多野,我以前真係做得唔好.

好似成日唔出街,自己話晒事,唔識專重個女朋友,三分鐘熱度,態度差.

係呢段感情入面,我不斷同自己講,唔好重覆犯返以前既錯.

我知道自己份人,堅持方面做得好差,好容易放棄.

我希望,我能夠不斷提醒自己要做好.

另外,記得要向天主祈禱,希望佢可以走入我地既感情入面,祝福我地.

我愛我既女朋友,我唔介意以前所發生過既事,我亦都知道,我係鍾意佢呢個人,唔係我心入面所幻想既一個女朋友.

佢唔係一個完美既人,我亦都唔係,但我愛佢所唔完美既野.

神父今日話,好多人內心都想操控住其他人,我要警惕自己,我要的,不是一個扯線公仔.

我要女朋友活得開心,舒服,做好自己!