Last Day Again

之前一路等以為空歡喜,原來更大既玩笑係: 要你等足兩個月

上個月12號終於收到封信,正式有offer

黎offer既時候正係出差,一時間手忙腳亂,即刻要辭職,以免要賠多D糧

時間緊迫,加上返黎要準備考final,根本冇太多時間留係office

最後呢段日子,其實冇幾多日係office,就連Farewell 都搞唔到幾場

由我4月收審查到而家,其實我一路都好唔捨得呢度既同事

我完完全全知道,出到去,肯定唔會再遇到咁好既同事

呢度既環境,係一班心地好好既人一齊工作,所以處身係度係好舒服

去到後期,每次返工,頭半個鐘都係去左同人吹水

對普通人黎講,可能冇乜大不了,但對一個唔多講野既人黎講,我係呢度講既野真係多過我一生人講既野

係呢度,連我呢D唔講野既人閒閒地都可以搵到人吹下水,一班人總係開開心心,會議室傳得最多就係笑聲

以前份工,返10點,我都會唔知醒起身. 係呢度,除左試過一次瞓過龍之外,我都未試過遲到,無論係返9點定9點半,好多時仲會早好多返去,而且次次都係自己醒,唔洗人叫

因為我好期待返工,係呢度返工係一件開心既事,可以同人傾計講笑,咁又一日

上一份工做左年半,對於我就係度日如年,係呢度,做左2年2個月,我都覺得時間過得好快

其實一開始我都怕自己會捱唔住,頂唔順,始終未返過大陸山區,但去多幾次,其實都幾鍾意返,因為D人真係好純樸,好友善

亦都真係好好彩,我兩年黎出trip都未試過係山區急屎,我都已經諗定如何在野外屙屎,但好好運,我唔需要嘗試

仲要每次去我都食好多野,但都未試過當場奶野,對於我呢D垃圾腸胃既人黎講,簡直係天方夜譚

一切都要感謝主,去山區有一定危險性,但每次我都安然回家。

亦都要感恩. 老實講,我一畢業就希望做一份穩穩定定既工,就好似黎緊呢份咁. 但天主巧妙既安排,使我可以趁住年輕任性一下,體驗唔同既野. 呢兩年既經歷,又係有錢都買唔到.

到而家,真係有點攰了. 本身半工讀一定係攰,我仲要顧埋出差,諗返轉頭我真係唔知自己點manage (雖然個個sem都係諗考幾日先學返晒D野)

去到咁上下年紀,錢亦變得重要,而始終好多制度上既問題,都令我開始失去當日既熱情同衝勁,既然係咁,不如退位讓賢,自己亦有機會諗下之後既路係點行

呢兩年發生既野,實在係太美好,有D自己都不能相信. 但難免都有D sacrifice, 好似自己冇晒自己既時間,唔係出Trip就係考試,考完又出. 而D trip非常唔定,演唱會飛同機票都唔敢太早買. 同屋企人和朋友既時間相處肯定係少左.

下一步我真係唔知岩唔岩自己,但既然做左選擇,就提醒自己唔好諗返轉頭太多,我唔捨得,但亦要move on.

只係最後,真係好可惜,自己既team大地震,我好懷念當初一班人去衝既日子, 好懷念上年前老闆帶住我地上大陸,好似學生去旅行咁,去飲酒,去食野.

不知以後再有冇機會發生了.

Thank you. Thank you so much!