2012 年回顧

新既一年又開始,一如以往,我都會係新既一年回顧返上一年發生既事,讓自己溫故知新

上一年寫左好多篇entry,有122篇,平均每三日就寫一篇

年頭開始,好灰,因為果陣認識到份工好唔掂,個人寂寞,父母鬧大交

幸好屋企既事,一二月既時候已經解決左. 仲有好多工見,包括電台,同埋我想做既政府工.

二月份
阿婆離開左我地,第一次見證親人離開. 傷心一定有,但我為阿婆能得到解脫而感到安慰.
工作上,出左一個大錯,令我非常唔開心,幸好不是很嚴重. 而且因為工作關係去左澳門三日兩夜,好悶,但有得出去行下,仲一個人睇梁靜茹演唱會,還自己一個心願.

三月份
終於出左自己第一張信用卡,張卡連埋八達通,自己終於獨立了.
冇野做,take左一個翻譯既short course,叫左有少少記託.

四月份
睇我呢幾年黎第一場戲,真係估唔到. 雖然仍然好頹.
工作上仍然悶,冇野做,但有工見.

五月份
最熟既同事被迫走,士氣好低落.
見工見極都係失敗.

六月份
去左人生第一次六四. 自己挖耳整親,搞到要去睇耳鼻喉.

七月份
成個六七月有歐國盃,屋企專登比錢睇,所以keep住睇,個人好夜訓.
開始都冇工見,但KK 出現了,個人開始有D野做.

八月份
同KK熟左,又睇戲又食飯又whatsapp
仍然冇工見,但開始多野做,成日OT

九月份
返左呢份工一年,仍都返左黎成年,冇野值得好開心
老豆被驗到有事,以為係cancer,好彩最後冇事
有得出trip,去左上海台北,難得有得離開香港,心情大好,除左比人加300蚊人工之外

十月份
有假放,去野餐
難得有工見,但份工就唔岩
做左件好錯既事
去左一個今生無悔既camp,改變左我好多

十一月份
被KK攤牌,我冇再聯絡去
同女友開始發展,第一次食飯衰左,以為冇機會,點知最後都一齊左

十二月份
份工好得閒,寄望2013年頭可以轉工
同女友拍拖,意想不到

如果唔計最後呢兩個月,2012真係好黑,好灰,好頹

黑,係指事業,一開始見咁多份工,都冇份見成,之後連工都冇機會見

灰,係對自己既前路,真係不知所措

頹,係指自己既生活,好悶,成日自己一個

其實最近睇返,自己返左黎,真係好頹,對身邊既野冇興趣,同熟人食飯都冇咩野講,可能因為份工搞到自己咁

同天主既關係,其實2012年大部份既時間都唔好,因為轉唔到工,冇女友,我真係好唔開心,我覺得天主冇聽到我既禱告

2012後半年,9月份有得出trip,參與其他工作,令到我做野方面冇咁頹

KK既出現,亦令我既生活有返D朝氣,起碼會有人whatsapp,食飯,睇戲

十月既camp,對我改變好多,我對人既關係,對自己既認識,都好左好多. 最重要,係將我帶返份天主既家入面

天主亦都對我好好,十二月,等左足足三年,我終於有一段新既感情. 我好愛我女友,雖然我地認識真係唔深,佢亦都唔係我一直諗住搵果種女仔,但相處落返而幾好. 為左佢,我改變左好多,迫自己出街,亦都冇諗錢既問題,真正見步行步.

呢兩個月發生既野,令我對2013年有返期望. 我相信以往我真係屈得太耐,所以變得更加沉默寡言. 我希望拍左拖之後,個人會更開懷,更有朝氣.

2013年,我最想就係可以轉到一份有意義既工作,唔洗再係公司浪費時間. 希望身邊既人都身體健康,平安順利. 同女友愈黎愈好!