一人行山

估唔到最緊局勢變得咁快，權衡過後，無奈要將裸辭大計推遲

最近返工又係好得閒，雖然我已經盡量搵野比自己做，但真係好唔開心

呢排天氣好好，好想行山，亦睇過唔少人話行山可以比自己靜靜地諗野，或者可以諗通一D野

的起心肝，幾日前plan好左去行屯門徑

父母知道我要自己去，都話危險，阿媽仲話要陪我去。好彩我有機會出去讀書，學會照顧自己，假如我一直係香港生活，恐怕會變成一個廢青。

反而女友只係哦左兩句，解釋過後都同意我自己去。

冇錯我係個好細膽既人，好多時想做一樣野會擔心呢樣果樣最後唔去做。今次叫做比自己一個小小既考驗。

做任何事情都總會有風險，但最適當既處理方法係好好準備，將風險減低。

首先，今次揀呢條路線，之前行過一部份，難度亦係家樂徑level，完成時間約2小時. 另外我專登上網Research定條路線，記低checkpoint. 三來，我亦唔會走去D危險位置影相，只會行主路。

今日一切都好順理，琴晚夜返夜瞓，今朝未夠鐘已紮醒。我最擔心既肚痛都冇發生，因為朝早去到廁所。天氣簡直完美。

我亦都好開心自己體能進步左好多，上次行頭段樓梯，一開始已經扯哮，今次一路大步上去都只係少少喘氣，仲有貨賣，可見呢一年黎勤做運動既成果。

成程只係用左2小時就完成，仲要中間試過行錯。我都知自己行得太快，而且去到後期冇乜位置可以坐底，未能好好咁諗下野，下次要留意了。

千祈唔好自己一個行山，會上癮的。當然，路程長，複雜同崎嶇既話，都唔應該自己一個行。