贖身傳

Follow up 上個blog post,居然不出所料,1星期後老細講透過我隔黎位同事向我傳聖旨,比奸臣所講既更徹底,唔只短期內唔去果度食,而係以後,因為食厭左

聽完又係唔開心,又係情緒低落,呢個order比上星期更震撼,因為係唔可以再去,抖下氣既機會都冇

當日下午到夜晚去溫書,我都好唔開心,條氣唔順,office係呢個荒無之地,仲要我湊住十幾人,又要D野黎齊,booking要穩陣,最好坐埋一台......我唔係亂做,係有諗過的,而且真係冇得比我揀

老實講,小弟無能為力了. 一開始我已經好唔鍾意做呢樣野,formally呢樣亦唔可以叫做係我工作既一部份,只係一種additional duty,我死忍,但我冇hea做,每星期準時星期三book定枱,星期四請示你老人家食唔食,我做足晒本份有餘.

咁既陣容,咁既地方,完全限米煮限飯,仲要搞我,真係巧婦難為無米之炊.

我不斷係度諗係咪我既問題,問左兩個同事,佢地都係鬧佢,話根本冇人想同佢食,一路食只可以聽佢鳩up,仲要aa 制同蝕埋的士錢

根本冇人明白,一件冇人鍾意做既事,每星期要煩一次,好啦,咬實牙關做,佢就玩野. 係啊,佢話唔去果度食,咪唔好去囉. 根本手頭上餐廳選擇唔多,係冇得揀tim,今次玩完你,下次咪又玩野,ban多間囉,佢最過癮

用左星期五大半晚諗,唔係咁wor,我唔可以認為自己有問題,以前幾份工既上司對我工作既評價都好好,有咩野我都會盡力去搞掂,即使呢樣野係我唔鍾意做,我都會去完成

而且而家唔係我唔捱得,上個位OT,工作多壓力大,頂到身體差到生蛇,仲有D焦慮,我照樣返工搏殺,冇放棄過. 而家根本係你要玩死我,唔係我做野有問題.唔可以比佢地搞到連我都質疑自己,我既工作態度係得到人地既認同的.

加上呢個地方既人和事實在有好多有問題既地方,對自己都有影響,我唔想再咁樣糾纏落去,決定離開,因為我相信,我唔值得咁樣,我係有能力既人,唔應該係度繼續由你侮辱.

當然,現階段未去到要裸辭,過埋呢兩個月就埋手執CV, 搵工,最緊要呢幾個月係儲錢,起碼要有舊extra既錢去辭職

黎到呢一步,只可以睇化,食幾多著幾多,整定的,命裡有時終須有,命裡無時莫強求,講咁多最唔捨得當然係份人工,我清楚知道出返去肯定一段時間都搵唔返咁既人工. 老實講,呢幾年我都唔係算享用左呢份多左既錢,除左去旅行手鬆D外,絕大部份用晒去交學費,而且自己儲蓄都增加左. 諗返起上一份工,同當時大老闆講我要辭職,其中一個原因係我要交學費,而家到尾聲,真係開口中,交完就收工.

今日都諗起,其實我冇後悔過用呢舊錢去讀書,係洗左我好多錢,但起碼令我呢幾年做左D有意義既野,如果冇讀書,我諗我個個Weekend都係hea住,睇韓劇,而家起碼我將會achieve左一樣野.

呢排趁減肥,我都食少左野,同埋好多時帶個包去溫書同返學,好似去返以前讀大學唔敢洗錢咁,亦都同事準備我黎緊將會搵少左錢既日子.

隨住人大左,物慾低左,再加埋黎緊搵少D,咪過簡單D,總好過係度比你慢慢玩,你地自己玩飽佢,我有個包,有杯咖啡就滿足了.

亦都要讚我既女友,今次件事佢成日聽我呻,我亦估唔到佢好支持我辭職,實在令我好感動. 其他人唔明都冇所謂了.