無辜 無奈

最近自己做野都有正面既改變,電話download左個app防止自己玩電話,心態亦都改變左,一黎到可能受到呢度既人影響,成日會質疑其他人做既野冇用,但後來自己諗通左,佢地做既野點樣其實唔關我事,最重要係我做好本份,幫到佢地做到佢地要做既野.

估唔到,今日突然之間就奶野

話說琴日同今朝都好唔開心,因為工作上活生生咁睇到其他人係幾咁乞衣,幾咁笑面虎,內心幾咁狗,忽然間realize自己身處係一堆野獸當中,一步一驚心

但點都好,諗住自己做好就得,最多自己要做多D,但總知做到件事,我不嬲都冇所謂

但點都估唔到有人會走去FB secret page上接近開名咁老屈我,暗指我同下屬行得埋,又唔做野

下屬send左比我睇,本身請左半日假係library溫書,果一刻真係好無奈,但又做唔到D咩,心情一下子跌到落谷底

好唔開心,好失望,覺得自己好無辜之餘,我更加明白到,我既事業或者已經玩完

做到進入第三年,我明白呢度既玩法,呢度既生態,加上做到差唔多4個月,我完全明白我上面D老細係幾咁賤格,幾咁縮骨,我呢D小薯完全係被放棄既一群,加埋我唔識做人,唔識講野

我知道我出事唔單止冇人會保我,更加有機會要隊我

我唔甘心,個post唔只係失實,最痴線係我黎左只係短短3個月,D人都未識我,什至未知我既存在,我亦未識晒D人,長期摺埋,完全保持低調,真係諗極都唔知有咩人可以得罪到,咁都可以比人做我

我知我知,做過幾份工都叫做好順利,諗返起除左第一份工有一次唔記得cancel booking搞到比人罰錢(重點係公司唔洗我比)之外,我好似從未因為做既而咁唔開心,上一個位都只係太忙. 證明我呢幾年都真係幾順利,而我亦知道唔會一直咁好彩.

但要我咁樣死法我真係覺得好唔抵,完全係乜都未做就比差佬塔.

世途險惡,我或者好了解政治既狗招,但我只係書生一名,實驗經驗等於零

我知道咁樣認輸係好很冇用,我唔會咁易放棄,但有D野真係唔到我話事,咁岩遇正weekend,等兩日先可以返工,到時先知咩料,但我作好最壞既打算,輕則比人放棄,苟且偷生,on99,生勾勾,冇得比你升,重則班狗人迫你自己執包袱

我一直覺得我唔可以失去呢份工,因為呢為工比到我財政上滿足,但有時D野整定的,係你既係你,唔係你既只會係貪心.

事實上隨住我搵錢越多,我洗得越多,但就越黎越唔開心.或者真係如女友所言,呢個或都係人生裡頭一個轉機. 我明白,但我真係冇咁既勇氣去面對.

但冇勇氣都要頂硬上,當你發覺原來突然間可以出現一D完全冇發生過但D人會信到十足十既野,而你又只可以硬食的話,你只能夠接受命運係咁樣安排,天主係咁樣安排

呢一刻,我好想離開香港,因為我真係透唔到氣