暑假回顧

估唔到暑假都要黎個回顧,今個暑假都寫左幾篇blog,聽日就開學了,趁仲有時間可以hea下,想再寫下,開左學應該就冇咁多時間了

今個暑假好多野發生,首先考完summer 個final就last day,之後就調位,到而家都入左位個半月,雖然開始返慣但心裡面仍然有不情願

可能之前實在太攰,呢個假我自己黎講算做得多野. 不過就好少返搵人去玩/食飯,寧願差唔多每晚返屋企食,食完可以瞓係張床睇kpop很爽.

今個暑假用電話買左幾套好戲睇,又睇晒最新一季house of cards. 人老左,weekend唔瞓得晏,幾次都係早起身出去做野買野,對於以前既我簡直係唔可能

再加上8月打左兩次8號風球,返左兩次風間,兩次都係凌晨掛波,很累

比較開心係今個暑假睇完一本書,幾年都冇試過,多得早幾日約人食飯前係cafe睇左好多

Anyway,呢個暑假算係比我有幾好既休息,話咁快又要返學,真係未ready

係呢度,想寫下黎緊呢一年既學習目標:

轉左新位,老細未知我返學,亦唔打算主動比佢知,位置遠左,趕返學肯定比之前辛苦同麻煩,況且之後既工作唔知會唔會對讀書有影響,但最後一年,希望自己能夠捱到落去

因為reg科既問題,我諗再讀上去既機會已經好低,因為take唔晒D 班,但諗深一層,我一問始既目標已經唔係讀上去,無謂太貪心

讀埋最後一整個學年,之後再加一個sem寫paper,我就完成了,其實往年心態都係順其自然,今年更加要強調,不是hea讀,只係唔需要再追好grade,唔好比咁大壓力自己,由13年開始,讀左4年,到上個Sem又係聽唔明但拎B,我相信大概自己都係有能力的. 同埋上個學年比之前讀得認真左,D野提早左準備,只要keep到,應該還可以的

總括黎講,今年唔想再比咁大壓力自己了,太chur果D course,真係避一避風頭,難得黎到呢個新位,我D焦慮好似有改善到,希望唔會再翻發

以上既諗法,好大程度係來自暑假睇完果本書. 本書講左好多野,我記唔得晒,但最後既總結,係叫人活在當下,意思係唔好諗過去,亦唔好諗太遠,focus呢一刻做好去,自自然然你就會去到一個點. 本書亦講到,平庸係冇問題的. 信心係來自自已,唔應該靠別人比既,人地點諗自己控制唔到,所以應該專注自己能夠控制既地方.

本書比到我好大既impact,因為好似做左廿幾年人,終於有個人同你講,你咁樣生活係岩既. 自己睇返以往,讀中學,都係揀一間中游既,當年根本就唔會諗到出外國讀書,仲可以入到間咁好既大學,就算讀cc既時間,自己既目標都肯定唔係最好果兩間大學,果陣收第一個offer,就係排第3果間,自己亦已經好滿足. 中間好多野,冇plan過,亦冇得plan.  唯一我可以講既,係我有出盡我既全力去讀,即使係咁,我當時都只係盡力,冇指住一個specific既目的.

到做野,就反而調返轉頭,好想好想做既工,一開始考唔到,頭兩年好迷失,之後果兩年入到一份自己想做又開心既工,想放棄唔再考既時候,又竟然考到,然後做左兩年. 我都冇諗過會係咁.

所以,我想同自已講,雖然真係有D可惜,讀唔晒D讀上去require既course,但自己一開始只係為左完成個programme,冇諗過要讀上去,亦知道自己唔適合係呢方面發展,所以不如拋開個包袱,好好咁享受埋呢一年多D,只要完成同合格就好了. 過左4年,我仲讀緊,冇放棄,我對自己都感到少少恩慰. 之前仲要邊出差邊讀,或者狂OT下去讀,我都能夠渡過,黎緊呢一年點辛苦都要捱埋落去! 讀完之後係點,who knows,呢一刻先做好吧!