轉變

Handover左差不多一星期,黎緊星期二就正式入位

上個星期日晚瞓唔著,臨瞓前仲胃痛,星期一二晚都瞓得麻麻

我既緊張又返黎,我既不安又返黎

好無奈,去完外國,返左黎幾年,都以為自己已經搣甩左緊張呢樣野,至少唔會再有咁大反應

但自從上年要頂個同事一半工作之後,個人情緒管理差左好多

無論我點勸自己,點祈禱都好,都唔能夠令自己冷靜落黎,好悲哀呢樣野係我就黎30歲既時間返左黎

亦令我諗,我只係經歷左第一個位就已經搞成咁,仲點走落去呢

其實諗返起我已經唔記得點解上年年尾會咁緊張,淨係記得係一段短時間入面多左野做

再諗深一層,可能加埋一入黎呢份工果段適應期太痛苦,果時一星期返足7日,又唔知做緊咩,又唔知D野點做,但就係因為我堅持落去,先能夠解決到D事情,捱過果一下,往後都好順利

我要同自己講,要帶走既正正係D positive 既野,而唔係不斷諗返果陣幾咁痛苦

人大左真係好憎轉變,黎緊新位既野我冇乜信心之餘,我上手做得好對我都係一種壓力

但再諗下,其實要做既野睇落真係唔太難,只係多,唔應該諗得咁負面,至於能唔能夠做得好過上手,呢樣真係唔太重要,做好本份就好了,上面點睇亦控制唔到

放暑假呢段期間好懶,幾經辛苦先迫到自己寫份野,想話去做運動,呢半年都完全冇郁過

對身邊既事物提唔起勁,唔想約人,每日放工就想返屋企,k pop又唔係太多野聽,韓劇又冇再好似以前咁追,同埋人老左,睇夜D都好眼瞓,加埋house of cards season five真係麻麻地

日日返工都怕肚痛,每日都係搏大細. 身體既唔舒服又醫極都唔好,都唔知究竟係心理既問題定係生理既問題.

希望呢個新位,唔會令我既問題惡化,而係比到我一個喘息既機會