2016回望

每年例牌動作,以前叫學大台叫大事回顧,今年改改名,因為冇咩大事

2016年實在冇乜野發生過,大部份時間都係做野同溫書中度過

逐個月去講真係冇咩好講,亦唔太記得,反而試下從各方面去講會諗到多D

做野方面,都係繼續忙忙忙忙忙,忙都仆街,特別係一月,又有野交,但同時又比女友迫我去旅行,老細又係放我,完全係瘋狂既行為

三月全城預備既大野,做落冇想像中咁大獲,只係老細突然sick leave兩個禮拜,咁都捱得住

跟住落去5,6月都好空閒,可以抖抖,七八月又地獄,但今次算好左,起碼少左weekend OT,更加唔洗星期六日都做

過左七八月既旺季,9,10月本來都忙,點知同Team有同事生仔,要頂一半佢既野,結果做到痴肺

壓力超大,多年冇左搞我既緊張心情又再來襲,腸狀刺激症又復發,真係有錢冇命洗

10月本來要去Camp,但整親,11月再去,估唔到自己一把年紀仲可以咁青春

anyway,做左一年幾,D野基本上上手,老細亦非常信任我,只係個位的確係Chur,18年只係想準時調位

感情方面,都係穩定地發展,去左三次旅行-沖繩,釜山同關西,其實每次都好開心,佢亦係我一個好既旅伴. 雖然今年大家都有鬧過交,有時仲鬧得多,但overall其實佢都好就我,我亦明白,冇乜女仔可以頂得順我既性格,頂得順同我去行超市

屋企方面,由七月開始到而家,兩老都冇再講過野,亦好彩佢地冇正面開拖,其實佢地想點我都冇所謂,老豆亦由好大既怨氣變到睇化左,我都唔知可以點,好無奈,大家逃逃避避,我既心中永遠都有呢條刺

今年仍然仲聽緊K pop,仍然咁熱中,韓劇方面,去到年中放暑假唔洗返學更加係越睇越勁,同時追兩套劇. 但到年尾,我發覺追劇追到好夜,個人身體真係好差,所以主力都係放工搭車先睇,今個聖誕假直程冇點睇過

呢一年,個人睇化左好多野,特別年尾,個人真係好攰,無論係身體定心靈,無限量既工作,加埋要讀書,令自己冇機會靜落黎抖下,連去旅行都因為趕行程加重自己既疲累

9月起其實個人積極左,為左去camp連續跑左6個星期步,每星期都堅持到溫書,每日仲舉鐵,但就因為太急進,整傷左條腰,傷左好耐,做左兩次針灸,就冇再做運動. 一句說話總結: 欲速則不達

除左整傷條腰,其實都realize自己身體好差,成日病,去完camp仲生埋蛇,結果好養生咁,個人早瞓左,冇再捱夜煲劇

今年7月加人工再升point,年尾呢幾個月仲因為頂人半份野而出多左糧,錢搵多左,但身體差左,個人好焦慮,屋企又咁,自己又冇晒自己時間,所以overall係冇開心左

呢段時間令我諗返起以前細個成日自己一個係屋企冇野做既時間,講真做左呢份工年幾,加埋讀書同拍拖,基本上完全冇自己時間,完全冇得比自己靜落黎.  今個月考完final,工作上又得閒左,難得有兩晚屋企冇飯食,冇約女友,自己一個周街走,我突然感到好開心,好enjoy,因為好耐都冇試過.  只係我仍然唔慣自己一個出街食飯

年尾發生既野,都令我question自己既前路. 我唔sure係咪可以長期做呢份工,我唔知之後條路應該點行,我唔知我係咪仲應該留係香港,只好見步行步

今年放棄左既野就係睇波,英超新開季係屋企一場都冇睇,冇辦法,要做既野太多,有既時間太少.

下年既目標,唔set太多,因為太多自己就唔會做. 好簡單,希望可以keep住一星期做一次運動,唔好病咁多,  希望可以更好咁運用自己既時間.