她受過苦

今日又同女友睇戲食飯,套戲長,等位耐,所以消磨左好多時間

聽日請左假,所以送女友返屋企. 今晚天氣凍,但都問佢肯唔肯坐下公園,女友好就我,答應了

坐左都成粒鐘,傾左好多野,傾下大家屋企既野,同埋我做D乜,佢係唔知的

發覺其實大家都唔敢問大家,怕大家唔想講. 我希望可以打破到呢樣野.

之後無可避免講到佢同J既野. 原來女友同J一齊既時間,真係受左好多苦.

其實一早都知J係有情緒問題,但我地平時見到佢,係冇乜野

原來女友係背後,受左好多,連恐嚇都有

J呢個人,只有兩樣野,一係愛,一係恨,由愛變成恨,仲可以對果個人恨之入骨,誓要將佢致於死地

我聽完,個心好唔舒服,好痛,因為我愛女友

我怪我自己,當年點解唔大膽D,主動追求.

當然咁講有D意氣用事,當年既我只有一個字,頹. 況且事事有定時,我同女友而家先開始,係整定的.

聽完,我當然對J好憤怒,雖然我知佢有精神病. 但呢個唔係藉口,可以為所欲為.

冷靜落黎,我作為教徒,呢排聽左好多句,耶穌叫我地要用愛去解決問題,要去愛人

恕我未能去用愛對待J呢個人,但我亦唔想做到惡言相向,互相攻擊,我為佢祈禱,希望佢可以盡快去接受治療. 我亦希望,呢個人唔好再搔擾女友,亦唔好諗一D無聊行為去試圖影響我地,損人不利己.

女友既經歷,就好似生活係驚恐中一樣,我明白佢既情況. 以前女友J都有做過類似既野,但當然對比女友所受既,簡直係小毛見大毛.

我應承女友,會好好咁錫佢. 雖然我同之前既女友都有講過類似既野,but i really mean it.

我明白,黎緊大家可能會有爭吵,熱情可能會有減退,但我希望趁呢段時間,可以為我地呢段感謝建立一個好好既foundation.

我真係好想好好咁去錫呢個女朋友,我唔想同佢計較D咩,只想佢開開心心. 我希望佢同我一齊,唔會再受到咁既痛苦.

所以我真係好注意自己講既野,做既野. 我以前係個好小氣既人,我而家盡力控制自己既情緒.

經過個camp之後,我學會到,唔可以淨係諗自己,仲要為對方諗埋. 以前既我,就係諗得太多,亦諗得太多自己,同女友一齊,我諗好多自己會面對既後果,差D因為一D唔重要既原因,放棄左呢段感情.

錯失太易,愛得太遲,呢個野係真既. 我要時時刻刻提醒自己,做個好男友!