唏噓

今晚終於約到舊同學D出黎食飯. 我好得閒,係佢忙.

原來佢搵到好工,有前途,亦好難考,真係佩服佢

A year ago at this time, 我地已經畢業,咁快就一年

大家背景好似,同系同學,自然自己會比較

大家好似起點差唔多,一開始我早過佢搵到工,就搵到呢份爛野

記得果陣佢未搵到工,出黎食飯,佢個人都係好灰,唉聲嘆氣

後尾搵到工,雖然係contract,但係見佢都充實

後來,佢搵到女朋友,之後仲考到而家份工,感情,事業都得意

一年後,佢風風光光

望下自己,都係寡佬一個,唔緊要,但事業呢

半年黎,次次都失敗,愈黎愈冇信心

我唔知仲有幾耐,先可以離開而家呢個環境

呢幾日又係冇野做,阿頭都唔理我,自己上網

黎緊暑假,真係會極度得閒,再走唔到就唔掂

同舊同學Say bye後,成程地鐵我心情都好低落,不斷諗,點解大家都係一齊起步,我會搞成咁

我明白,佢係名校出黎,的確係有優勢

前路,係點,唔知,睇唔到

唔可以怪任何人,只可以怪自己,自己冇用,耶穌都幫你唔到

係呢間公司,自己越磨越蝕,可以點?

原來咁就畢左業一年.呢一年,我過我好廢. 舊同學冇枉費到,一條光明大道在前面,身旁有女友扶持.


P.S. 今晚係銅鑼灣食飯,其實都諗過會唔會撞到前女友. 好彩冇,但係CWB撞到人都唔算抵死,個個都去果度. 見唔到佢,唔駛比佢見到我而家極度死狗既狀況. 希望呢一世都唔好兜口兜面撞到佢.

P.S. 2 有一樣野更值得提. 畢業一年,大家唔多唔少都成長左. 舊同學性格好左好多,可能加埋佢有拍拖. 以前既佢講野好直,但今次反而好鼓勵我. 其實大家識左唔耐,只係短短一年都冇,去到senior果年先識得佢,但大家經歷既野好多,諗野有D似. 今晚大家都講,如果當年係去SD,可能果兩年大學會讀得更開心.