洛奧民 三0再度出發

上星期喉嚨痛,食左藥就冇事 但後遺症好嚴重. Weekend開始個鼻好塞,比D痰痴住 琴晚訓果陣好辛苦,氣都抖唔到 四年黎係美國都唔會咁,香港既環境真係越黎越差 琴日上埋最後一堂翻譯. 總括來講,教得幾好. 唔經唔覺都上左成兩個幾月,雖然每星期一只係上一堂. 成功地識唔到人,其實都預左. 今日又去見工,又死左 不過今次都總算有D得著 見我果個人其實真係幾好,同我傾左好多野 佢係想請我,但又唔想請我 佢睇得出我寫野係OK,但亦睇得出我唔識做人,靜,同內向 老實講,我知我係內向,但我一直以為見工既時候可以掩飾到 我會講好多野,亦會主動問問題,但唔明點解人地都可以睇到我係個好靜既人 之後唯有再再再主動D 我都想改善自己內向既性格,但真係一直都做唔到. 我諗冇咩工係唔需要良好溝通能力. 只好迫自己講多D野la. 果個人真係好勁,佢睇得出我好多野 佢話好多fresh grad都會係第一年做野既時候有進步 佢話佢睇到我只有30%. 其實我都贊成佢所講. 本來係會幾好,但我自己都唔為意,呢幾個月係公司冇野做, 搞到自己都頹埋,冇左種衝勁 總之一句,好多野要執執la 同埋,其實我自己都係想做又唔想做呢份.

星期六,做左獨留兒童 父母上大陸,家姐返工加去街,幾位一早已經係咁問我有咩做 有D咩做,個個星期六都係咁過,起身,下午,煮面食,hea 不過其實今個星期六係有D野要做,參加公司一個program,義務睇application 一早起身,差唔多兩點,fail,唔明點解又咁晏先起身 我已經唔係早返工,唔係遲放工,又唔係特別多野做,星期六都咁累 點知電視做緊機動部隊-警例,好鍾意呢個系列既戲 雖然係美國睇過一次,都忍唔住再睇 兩點幾先去煮過韓國薯仔面食,之後hea睇電視,睇左陣波, 終於到四點幾肯出去買野. 因為已經plan左自己整焗豬扒飯 去到百佳,好彩仲有新鮮豬扒賣 仲買左pack天然洗潔精. 老豆成日話我返左黎唔理屋企野,唔係我唔想理, 係佢攞晒黎做,又唔接受新野. 買家庭日用品呢D野,係美國四年,同兩批人住,都係我理既,從無缺貨 所以佢地唔係屋企,又係我發揮既時候 不過真係唔明,我搵個鍚紙兜焗飯,淨係搵到焗麵包果種長型,好少款,點解咁難買 返黎睇左陣電視,睇埋傑志戲劇性拎足總盃冠軍先去煮 其實幾多野要搞. 先炸豬扒,估唔到炸得幾好. 再炒飯,之後煮汁,再拎去焗溶芝士. 我覺得自己整得幾好,好食,唯一焗果度掌握得唔好,太大火,有D芝士原條燶左 今日買完野返屋企,先發覺屋企真係幾靜. 好耐冇試過,多數至少都會有老豆係屋企 但其實自己係美國都慣左,只係成日要溫書,愈靜愈好 今日亦冇做過野,始終又電腦又電視,好難集中 只係自己身邊既人緊張過我 阿媽,家姐係咁問我有冇野做,叫我去約人. 星期六通常唔會諗,除非有人自投羅網,平時要返工,呢D時間人地要拍拖 post左張焗豬相上FB,一位唔多聯絡既美國舊同學B無啦啦message我,話唔知我自己一個係屋企,如果唔係約我食飯 我話,你同女朋友食AR,佢話係AR,真係好彩,多謝你冇問,我寧願係屋企一個人食,都唔想做燈膽 係百佳見到一對對係度買野已經好想快D走,我比較喜愛一個人靜靜地 不過點都好,呢位同學都係出於好心,我都好感激佢既心意 靜,悶,一個人,我從來都唔怕,反而身邊好多人會覺得好大件事,特別係香港,好多人去廁所都要搵人一齊 係美國既時候,都慣左,一個人想做乜就做乜,自己一係死讀書,一係就係hea 一個好鍾意留...

一直比屋企人話我唔識投資,其實我係懶得睇 之前又成日想等個市低D,雖然我知我買完一定跌,好野實冇我份 早排得閒睇,股市keep住跌,心水果幾隻又幾好位,入市啦,橫掂我係長線 但係第一日,小弟唔識玩,set得太低,對唔到盤 之後再set,一次set兩隻,兩隻都對到盤,仲要係低過我set既價 擺埋一邊,得閒先睇 愛情都好似對盤咁,有人買,有人賣,先對到盤 我就好似一隻毫子股,平都冇用,賣出黎都冇人對盤 換過角色,就好似睇岩隻好既股票,自己又唔夠本入 借孖展,結果會係死得更慘 此時此刻,我心裡面只有呢句說話: "I am nothing but a piece of shit." 冇事業,冇錢,冇樣,冇身型,冇口才,冇癮既人,一早已經被交易所除牌,諗都唔駛諗. 琴日喉嚨發炎,好辛苦,個喉嚨好似比火燒 但有重要野做,所以都係要返工 好彩可以早放,去睇醫生,等左一粒鐘 醫生見到都話好紅. 我知喉嚨痛睇醫生好似小題大做,但我自細口喉嚨,如果唔止得合時,就會好嚴重 返黎香港8個月以黎,已經係第二次因為咁去睇醫生 即使我有做運動,身體始終係差左,香港既環境真係好易病 希望唔會越黎越衰 今日係廁所洗碗,有個裝修阿叔咁岩入黎 佢個樣好狠,所以都廢是望佢. 但佢居然打開話題,仲幾友善 佢好驚訝我帶飯,我答佢,係AR,D野貴MA 佢笑笑口講,咁你咪儲埋好多,我笑笑口答返,就係冇先要省 之後佢出去同個清潔阿嬸講,個阿嬸都驚奇我帶飯 公司個鐘點見過我帶飯,又話咁乖仔AR 係AR,冇錢MA. 如果佢地知我之前四年係美國都係捱面包,可能仲驚訝 諗返起,以前係美國會自己一個食lunch,就係廢是比人見到 對於我黎講,呢個係留學一個好好既體會,亦省左好多錢 之前係美國好憎食包,但返到香港成日帶飯,我更憎食飯,因為我好憎好飽果種感覺 其實我希望,自己有一日做左成功人士,可以下午去食個貴夾唔飽既三文治/沙律做lunch 當然講緊係好靚果種.

最近心情都比較低落,諗野都比較激動 早一日有時間諗清楚,自己好似成世都未試過做好一件事 以我最引以為傲既讀書. 冇錯,係讀得幾好,但自己知道自己未盡力去做. 由細到大,好多野,都冇盡力去做好. 中三學結他,自己又唔肯練習. 會考,study leave又唔讀書. 好多好多野,係做左,完成左,但冇盡力去做好. 諗下諗下,好似冇試過做好一件事. 無論自己接受唔接受好,擺係面前,就係自己未可以轉到工. 黎緊都冇interview,今個weekend又唔得閒睇搵工網,所以呢排都會比較靜. 事實係,我要留係而家呢份工度,自己當然要繼續努力去搵, 有下一次見工既機會,一定要準備好. 再有時間,更加要執下resume, cover letter. 係而家呢份工,要全心做好,雖然冇咩做,但係有咩係手,就要做好. 近來比較成功既,係跑步. 上年十月開始跑,十二月太凍停左. 三月重新黎過. 其實進展都唔錯,至少至少,每星期都跑一晚. 黎緊都要keep住做運動, 飲食要健康.仲要健身,練好body. 總之,以後要做好每件事.

呢個星期係公司,非常得閒 冇野比我做,自己亦摷唔到野黎做,大部份時間都係上網睇無聊野 呢種生活,我真係好厭倦. 其實係咪我要求有問題? 我只係想忙D,有野做,唔好返去坐,咁都唔得? 每朝起身,就係我迷茫一日既開始. 每朝都係問自己同一個問題: 我返去做乜? 係AR,都冇野做,返去坐,扮有野做,唔好等人覺得你廢.自己卻唔好意思拎呢份人工. 今年起,每次見完工,我都好緊張之後果兩星期. 因為如果請既話,多數會係兩星期內知. 結果,換黎既係一次又一次既失望. 到而家,簡直係絕望. 上次見工到而家,兩星期la,每一日都留意住個電話,每一日都失望. 其實,如果一個星期左右都未收到消息,自己都應該知咩事. 有時我覺得,即使係reject, HR應該盡早通知申請人. 等果一刻,係好痛苦. 一次又一次既兩星期,每日呃自己,可能聽日先打黎. 朝早收唔到call,可能佢下午先會call. 我真係好想離開公司. 咁樣落去真係好冇意義. 但我走唔到,我祈求左好耐,好多次,自己見工亦盡力,點解次次都唔得? 我唔想每日都做全屋最早返屋企果個. 每日阿媽都問我返工有冇野做. 每日我都聽到其他人有幾忙,自己返工除左上網都冇野可以做. 最近報既工,都冇搵我見. 連見工既機會都冇,又唔知要等到幾時. 到有得見,都好大機會會衰. 我唔敢再求,我唔知自己仲有咩可以做. 心情真係好谷底,完全冇心機做任何野. 我每一日都問,我生活既意義係咩? 為左著住套恤衫西褲返去上網?

最近想起,這個blog不知不覺開了三年 想不到,仍然能維持. 更加想不到,三年來,寫的東西都是灰的 呢幾年,好難諗到一個自己開心既moment 係美國都仲好D,至少畢業典禮果陣係開心,真真正正四年心血 做intern,返大學教堂,都有開心過. 上年去南非,雖然成程都水肚不服,但亦開心. 返左黎香港,我諗除左係我搵到工既時候係開心,之後一直都冇開心過,亦冇野值得開心. 近幾個月更加唔開心,全因工作關係 每日返工,冇野做,冇前景,冇人工加,我都唔覺得自己值得收份人工 我唔係淨係坐係度,我有努力去搵工,但今年見親每一份都衰 我有諗過係咪見工有問題,有準備過 我唔再諗感情問題,放棄愛情,只係想全心全身搵入工作,清磨時間 但我冇辦法做到,面對一份咁清閒既工,我冇咩可以做 我明白,就算轉工,都未必改善到現況,但我仍然希望改變 呢排心情真係好差,完全唔想講野,即使係屋企都好 心情已經跌到谷底,我真係唔知我心理仲能夠頂幾耐 天主,求你讓我能夠離開現在的生活!!!

星期一返工既時候,公司靜左好多. 同事K唔係度,少左個人吹水. 自從知道同事K係被迫走之後,士氣真係極度低落. 當場更重要既係自己好想走. 每日返去冇野做,冇目標,遲返早放. 琴日見老細,為左份評核. 佢同我根本冇直接工作關係,所以都係問返我兩位上司既意見 其實我都有諗過佢會炒我,但佢又一早叫我同其他同事頂同事K既野 結果份野寫得幾好,都有讚我. 我自己都估唔到,因為我唔覺得自己做得好好. 老細話會比多D機會我,聽完就算. 係呢間公司咁耐,我已經聽過好多野,但每樣野都唔會發生. 我都唔明,講既人,係覺得講完就算冇所謂,定係咩心態呢? 之前成日都滿懷希望,都次次都係比人老點. 出黎做野,真係唔好咁易信人. 人工冇得加,其實都唔太重要,我只係想走,就算加都係幾舊水,算吧LA. 感覺到自己好冇力,連祈求既力都冇. 點解唔比機會我? 見左咁多份,份份都炒,發生咩事? 我只係想走,重新開始過. 日日係度坐,真係唔好過. 呢排既心情,其實都已經谷底,野都好少講,亦唔多想講

今日同事K last day,一朝早冇點同佢傾 其實我好多好多野想問佢,但office絕對唔係一個適合既地方 食最後的午餐,老闆吹雞既,結果去左食上海野,幾好食 但最後原來係夾錢,冇所謂,就算唔係大家一齊食,我都好想請同事K食送別佢 返到去,同事K執下野,同佢吹下水,都係好多野唔講得. 佢買左盒好貴既散水餅. 放工之後,忍唔住whatsapp問佢搵到咩工,原來佢未搵到 更加估唔到,原來佢比人迫走,老闆同佢阿頭都話佢表現唔好 呢個根本唔係原因,因為同事K冇咩可以做 但見到做野血腥既一面,佢比佢阿頭煮死左,亦都可能因為間公司想省錢而迫佢走 講真,全公司最應該走既係佢阿頭,因為佢阿頭最廢,冇人鍾意同佢做野. 呢件事亦都比到我危機意識.之前諗呢間公司唔會炒人,因為根本冇人會做, 點知都係會郁手. 其實我好彩,如果唔係我做岩個program,死既一定係我 呢份工冇機會比我表演,冇前景,離開唔係問題,只係比人炒,始終係有點兒那個 我都要盡快離開,以免先比人斬頭. 祝同事K一路順風!

今日sick leave,實在太好彩 朝早家姐,兄弟K,同同事B都打黎提我唔好搭西鐵,因為壞車 其實我都預左會有咁既一日,因為始終鐵路都會壞,香港相對其他地方已經好好 係外國,壞車咪壞車,理得你. 不過今日影響唔到我,所以我感受唔深. 下午去見工,差D比個村巴司機累死,枝枝紅燈都過唔到,絕對係車后 爭D遲到,其實自己都有責任,咁多時間,都冇預早出門口 去到岩岩好,應該係見咁多次工以黎第一次 見呢份都係做返類似而家既野. 一開始發覺,原來係四個西人見我 真係有點淆淆地,因為好耐冇講英文,亦好耐冇係咁聽英文,好彩都仲頂到 今日既表現,算係咁,不過有D緊張,好多野預備左都唔記得 經過之前既失敗,今次連準備地講稿,反而覺得效果冇咁好,但自己準備既唔足夠 見完之後,的確對呢份工有幾大既興趣,應該呢兩星期知結果,順期自然!

今日無啦啦開會. 本來兩星期一次,而且每次都係星期五. 但老闆話要傾newsletter,所以開會 通常開會都唔到我講野,照常齋坐 點知都最後,老闆宣佈有人要走,估唔到係同我一齊入職既同事K,仲要星期五就last day 同事K當日同我一齊入職,一開始覺得佢九唔搭八又有D寸,仲諗係呢間公司我將會好悶 點知到而家為止,我稱得上最熟既,係佢. 佢咁岩坐我旁邊,大家有時D野趕會幫下大家,佢又幾好傾,仲應該係全公司最正常既一個 大家逢星期五就唔帶飯,有事D同事唔響應,我地兩個都會自己出去食,趁機數下自己既阿頭 呢位同事都教識我好多office既野,因為佢比我多幾年工作經驗 最記得我問佢,係電話度,點樣可以同人講"黃"同"王"既分別,原來"黃"叫大肚黃 而家諗返起,呢幾日佢都有D怪怪地,講野串串地,唔知諗緊D咩 但係其實我幾唔捨得佢,我好清楚我對佢係冇野,只係office入面,只係同佢FD 另一個FD既係我阿頭,但做野難免會有衝突,有時吵完真係唔係幾想再對住佢 其餘既同事,做同事I係工作上同佢冇乜接觸,但最近開始叫做熟D,多D傾計,但同K冇得比 同事W係少數男同事,係好人,但真係好難觸摸 其餘果D大佬級,只有工作上既關係,什至連工作關係都冇,因為我太卒仔 冇左同事K,第時星期五就唔知同邊個去食飯la 之前同同事K傾計,佢都冇講過要走,仲諗住會留, 點知而家就走,最勁既就係唔見佢去見過工, 所以出黎做野,真係唔好講咁多野比人知,所有野都要保持神秘 點都好,其實我都感到好好彩,第一次出黎做野,身邊D人都好好, 祝同事K一帆風順.

今日放工,電話show有email. 呢排都知政府工會放榜,所以都留意住. 一打開,失望. 有少少估唔到. 畢竟位都唔少,況且自己覺得面試當中做得唔錯. 其實真係唔明,究竟面試要點做先可以成功. 已經問左人,都係答果D野,都係唔得. 由年頭見到年中,一份都唔成功. 冇錯,有部份我冇努力,但大多數我都有用心去見. 可能我同政府工無緣. 上年未到面試已經行人止步. 今年有3個面試,以為會叫糊,點知都係空手而回. 就算下年再請,我都真係冇信心可以入到面試. 今年真係好彩,因為考筆試當日朝早要監考,累到不得了. 一早打定輸數. 下年,除左因為離開學校耐左,寫左能力差左之外,仲會背負好大既壓力. 點先可以考返上年果個成績呢? 命運係咁,都唔知可以講D咩. 我真係唔想留係而家依度,日日返去唔知做乜,一係就無謂野. 但我覺得好無力,做咩都做唔到,足足半年,走極都走唔到. 今日腦海突然閃過一下關於做神父呢樣野,可能因為星期六神父講有關聖召 其實我諗,我可能將來有機會會做神父 因為,感情呢樣野一早已經唔關我事. 事業方面又冇得發展. 但我仲未認識呢個社會,仲未經歷過好多野,就算做,點樣可以帶領人? 況且我對聖經認識唔深,控制情慾又差,點做? 就算真係,我都要搵錢比父母養老,唔可以不負責任咁走左去. 將來既野,冇人知,但一早預左會單身,橫掂都係,不如奉獻比教堂,唔好浪費左呢樣野. 我而家對前面條路都冇野好講,見步行步吧!