洛奧民 三0再度出發

今日都係好多野做,又要外出,但黎緊四日假,真係好期待,終於可以抖抖 今日下午老細冇lala個個派信執,加多句唔好失望 原來係加人工,狗到寫年薪,計返原來係加3舊 haha,真係唔知應該開心定唔開心好. 講真probation果陣佢冇加比我我都唔太gur 而家加左,真係得啖笑. 算吧la,橫掂都諗住走,加唔加呢幾舊都冇乜影響. 今晚同KK約左睇一路向西,去到葵芳,果度唔錯,唔算好好好好多人,最緊要少自由含 所以呢300水就係呢晚洗晒,請佢食飯加睇戲,洗左佢冇咁嬲 套戲都OK,預左會無無聊聊,但估唔到幾激,同KK睇真係有D搞笑 但佢唔介意,咁都冇乜野既 之後去左食糖水,再係公園吹左陣水,11點幾先走 其實最近,我發覺得已經記唔起女性身體同打車輪既感覺 諗下諗下,都4年,同上手分手4年,呢4年食全齋,搞到而家連女人係乜都唔太知 再係咁落去我可以得道升仙. 不過我都唔想諗返起,上手已經係我腦海中消失得七七八八. 其實KK真係一個幾好既女仔,但我真係同佢冇果種feel,所以都係做朋友好啦 早兩日TW姐姐返美國,臨走sd左段FB msg比佢,想鼓勵佢,佢居然一個字都冇覆 可能FB出錯,但算吧la,可能我真係幾煩.

好想寫blog,但真係冇時間 是咁的,返黎之後,仲要執手尾,但自己個program都好多野搞 而且成個星期都差唔多要出去,又放得夜,一時之間好busy 但我enjoy呢個moment,可惜我知過多一兩個星期就會好得閒 其實我都估到最快下年年頭先走得,無奈,但冇計,而家要走真係唔易 點都好,做好手頭上既野先 呢排都有D累,好想放假,所以好期待呢個long weekend 阿爸今日有結果,冇事,thank god!!! 大家都鬆一口氣!!!

琴晚終於返到香港 今次既旅程,好辛苦其實講唔上,只係訓得唔好 可能始終要同同事同房,唔慣,亦都要諗住做野既野 上海比我想像中好,比大陸其他地方,所以野都正常D 只係第一日日光日白係條大街見到老鼠,which reminded me I am still in Mainland 講左好多中文,應該都有D進步 上海果part衰左,總部的阿姐黑面黑到爆,但我發覺我實在太細粒 鑊唔到我揹,罪唔會怪到我身上,所以好彩都唔關我事,但兩位同事就有得震冇得訓 去到台北,簡直由地獄走回天堂,人實在太好,所有野都好好 今次有機會食牛肉面,食左兩次 去到第一日,先知原來上次南非識既台灣姐妹,個家姐仲係台北 好彩買左電話卡,成功約到佢,最後一日我偷雞留低 見返佢真係好開心,但遺憾我真係唔夠時間,好多計想傾都傾唔到 佢真係好好人,知道我想買鳳梨酥,又唔夠時間,就叫佢阿媽拎兩盒比我,結果就見埋佢阿媽,真係好好人 走之前影相,我真係好耐冇影過,亦唔鍾意,但今次破例,仲要係我提出既. 因為實在太難得. 去到巴士站,佢送埋我上車. 果種感覺同一年前一樣,當日我轉飛Cape Town玩,係機場整野整左好耐,但又要同班鬼食lunch,好趕時間 但佢地都陪我,好趕咁食,食完衝去入閘.入閘之前同佢兩姐妹hug,今次同家姐亦都有. 果一刻真係好唔捨得,有D想喊,因為果兩星期真係幾辛苦,又唔知幾時可以再見到佢地. 今次其實都有少少,因為估唔到一年後,就可以再見,雖然見唔到兩姐妹 但今次家姐返美國搵工,如果做野都未必有機會可以成日返 我同佢地雖然識既時間唔多,但大家真係經歷出生入死 希望可以好快再見到佢地兩姐妹,亦希望我地真係可以stay in touch 返到香港,覺得個人都好似鬆左,因為成年冇離開香港咁耐, 留係香港,日日趕返工放工,人又多,煩惱又多,真係愈黎愈頹 但出去叉叉電,真係好好多,而且去到台灣,心情真係會好好 我一定會再去!!!

後日出發去上海,之後去埋台北先返香港 成年有多冇坐過飛機,對上一次係南非返香港 坐完果次飛機之後我發誓短時間都唔坐飛機,而家時間岩岩好 今次其實好淆底,要搞既野唔係我果飯,但都要頂硬上 希望D野順順利利,如果唔係我真係係呢間野度玩完,雖然我一直都好想走 但我唔想失業 琴晚同KK出去食飯,食完去左麥當勞食雪糕同吹水,傾左成個幾鐘 突然諗起孫柏文定律,如果個女仔肯係第一次date同你去M記,個女仔得過 呢個standard當然太harsh,但講真而家D靚仔靚妹真係太痴線 十幾歲已經食百幾二百蚊既晚餐,有時仲唔止 周圍去旅行,買靚衫靚鞋,一係就成日去酒店食tea 所以如果而家D女仔肯同你去M記,已經真係好好 anyway,到而家大家都只係好朋友,我似到呢度就不能行前一步. 今日終於搵到家姐陪我去買鞋,仲買埋衫 一直都好想買,但結果頹左成個summer,D衫著黎著去果幾年 到而家轉秋裝先買,夏天衫又要再等 買左成2000蚊,對於我算大出血,但返黎香港真係第三次買衫叫做,所以唔算肉赤 況且我D野著幾年,買貴D都唔過份 希望著返好D,唔好再比人當係細路

首生講KK.星期二佢主動搵返我,仲傾左陣電話,所以又resume返好似以前咁whatsapp 好啦. 話說老豆早排唔舒服,初步驗可能係can 上星期知果陣,唔開心,個心唔舒服 但冇計,只有搵醫生醫. 但老豆又係度拖. 早兩日阿媽問我先知,原來老豆冇講佢知. 今晚返黎,星期日要驗,阿媽話係有野. 佢話老豆擔心錢,雖然屋企層樓未供完,但係可以翻按既 但就要轉左我同家姐個名,由我地供 其實呢個方法係最好既方法,而且當年曾經諗住賣樓比我讀書, 最後都唔洗賣,所以而家咁做,都係好合理 只係對於我黎講,雖然我都係比返咁多家用,但就用黎供樓 更大獲既係,一供就30年. 而我岩岩先出黎做野一年,就要揹層樓. 咁樣,我同一個結左婚生左仔既人有咩分別? 我追求既單身生活,愈走愈遠 而且,我而家搵既錢,都唔夠自己洗,仲要供埋樓,更加唔可以亂洗錢 就算轉到工,有人工加,都係要顧住供樓, 又多一個理由唔洗諗住溝女 當然,水深火熱既情況,都係要接受,況且係自己老豆,佢安心就得 算吧la,老豆為左我頂左廿幾年,呢D真係冇得計 最緊要老豆冇事la

琴晚訓得唔好,訓下醒下,返黎咁耐都好似未試過 半夜想爬起身睇點票,但放棄左,廢是起身後訓唔返 睇怕我都sense到泛民會死得幾慘 我支持政改方案,當年我支持民主黨,因為佢地果陣真係開始識玩政治 到而家我都唔覺得佢當年係錯,但可識大部份人都唔明 點都好,建制派配票完全係冇得頂,泛民唔走返埋一齊,就會好似今次咁,拎得多票輸議席 但今日最開心,都係劉江華仆街,大家都估佢唔到. 今日成日都冇同KK whatsapp過,可能佢都feel到我琴日燥燥地佢 又或者我琴日態度真係好唔掂,佢都唔想同我講野 anyway,我接受唔到佢投白票,對政治方面既野,我有我既執著 都話今年係黑仔,以為有機會,一下子又玩完 不過都好既,而家叫做重過以前既生活, 電話唔再成日響,唔會成日拎住部電話覆message,返工唔會唔專心 夜晚有多D時間做自己野. 況且,我選擇左單身這種生活態度. 見到老豆老母為少少野又面左左唔講野,真係好火 返黎成年,成日都係咁,大家出街食飯又咁 所以我對婚姻生活絕對冇幻想 對於我,relationship 同 marriage 都係fucked up 既 ideas 自由自在生活最好

上個星期成個禮拜都OT,係好事,但都係做唔晒D野 聽日阿頭返黎,真係唔想見到佢,而且將會人格分烈,anyway,冇辦法,走唔甩就要硬食 今日立法會選舉. 上一屆,我仲讀緊書,咁岩係香港未走,幫左一位泛民議員助選,最終佢輸左 其實果日都好hea,絕對睇得出泛民係唔識搞選舉,但都幾好玩,見識到D野,不過搞完就病到PK 其實畢左業,返埋黎香港,個人都冇以前咁熱心,咁上心 部份原因係讀得太多,明白做好多野都冇乜用, 但返黎之後,實在不能再忍,情況愈黎愈差,愈黎愈過份 可惜而家香港既政界真係好亂,鬼打鬼,益晒保皇黨 其實我支持白鴿,因為當年政改方案,我覺得佢地做岩左 政治談判,當然係閉門,當然係有野輸,但亦都有野攞返 一人兩票,我覺得係good idea, 以全港為單一選區以比例代表制投票,係大勢所趨 況且有得搏,點解唔搏,保皇黨都唔係win緊 只係白鴿太冇用,比人話幾句就退縮 果批叫人投白票/自己投白票既,我真係唔明,點解要比保皇黨win 最近同KK關係好好,又電話又成日whatsapp,每日早午晚都有 但今日當我問佢投咩,佢同我講超級區議會投白票,唔好意思,我接受唔到 我接受唔到身邊既人會咁做,我只會尊重佢既決定,始終我支持民主 好老實講,我真係有諗過去追求佢,因為覺得佢性格真係幾好,幾適合 但過左今日,我一定唔會咁做,我不能接受一個投白票既人 更令我諗返起上屆,我仲同E一齊,佢唔識政治,但佢有聽我講投邊個, 我唔係需要一個扯線公仔,如果佢有心水我都唔會阻止佢,但我唔知咁樣係咪會比較好 所以還是算吧la.我好執著,特別對政治,呢樣我不會退讓. 所以,對於我覺得單身係最好既選擇.