過多幾日,我就會係度做左3年 3年呢個數字,對我黎講有好多意思. 首先,呢份係我畢業以黎做得最耐既一份工,第一份工做左一年半多D,第二份就兩年多少少. 其次就係對於我既身份,經過長達三年既試用期,理論上你既聘用成為左permanent,係呢個世代十分陌生既一樣野. 其實簽之前都有少少既猶疑,因為一簽,第時要走,就要比三個月通知. 後尾睇返條款,原來賠錢既話,只需要一個月糧就走得,不得不歌頌呢個良心僱主. 老實講,今日唔知聽日事,因為聘用條件既唔同,中途離職其實冇乜特別大既損失,係咪做到最後,經過呢幾年既觀察,唔係由你話晒事 好多人幻想,入到去冇人可以踢你走,咁講係冇錯,但你假設既係所有野都順風順水. 見到唔少人,一路做,個位越黎越衰,D野永遠都做唔完,有開工冇收工,同事恰鳩你,老細(性)虐待你,D客屌柒你,有時唔係真係你自己想走,咁多野一齊發生,你係咪真係頂到? 夾硬頂頂到自己身心受損,為左D咩? 仲要真係發生既時候,你頂到先算. 一入黎個位,開始真係做到扒係度,到後尾即使熟左,都係多野做,仲因為做得而比委託更多工作,果陣真係做到焦慮症,日日返工搭地鐵就係肚痛,個心跳唔停,但老細好人,好肯教我,係我咁多個老細之中最好,所以都好珍惜果段日子. 到呢個位,冇野做,有都係D無謂野,日日準時收皮,老細唔會同你講D咩,問佢野仲衰過去黃大仙問前程,係空閒過以前,但完全學唔到野之餘,個人亦越黎越退步,每日都唔想返工,每日都好想離開,經過一年我終於勸服自己,就當係為左搵錢,儲到錢之做自己想做既野啦. 況且,睇返出面,都要面對現實,如果想搵返相近人工,根本冇可能 面對將來,只係想逃離香港呢個地方,當務之急,只好努力搵錢,唔通仲諗住去洗大餅,我肯做人地都唔肯請 最糾結既係我今年就30歲,真係走又唔係,變又唔係. 走,未諗到做D咩,唔想行返舊路,因為舊路仍然係咁樣 唔走,就算唔想咁就一世,之後變既成本只會越黎越大,機會越黎越少 諗下諗下,都係搞掂埋讀書先慢慢諗. 係度過左1年,仲要至少兩年要坐係度,捱唔捱得過都好難講.
洛奧民 未滿18歲出發留學5年 2011年回港投身社會 今年30 準備成家立室 工作上卻不安份守己 時機未到 期待人生再次出發